Bydd arbenigwr byd-eang yn rhoi darlith gyhoeddus o dan nawdd y mudiad dyngarol Cristnogol Tearfund ym Mangor nos Wener 7 Tachwedd 2003. Bydd Syr John Houghton yn dangos effaith newidiadau yn yr hinsawdd ar rai o wledydd tlotaf y byd.
"Mae’n fraint cael arbenigwr o fri i siarad ar y mater pwysig hwn yng Ngogledd Cymru," medd Trefnydd Ardal Tearfund Miriam Evans. "Rydym ni yng Nghymru yn cyfrannu at gynhesu'r hinsawdd ac mae hynny’n effeithio ar rai o bobl dlotaf y byd. Mae angen i ni ganfod sut i newid ein ffordd-o-fyw er budd pawb."
Mae Cymru yn barod yn cael ei hystyried yn un o arweinwyr gwyrdd y byd, fel un o dair gwlad sydd â chynllun sy’n rhoi gorfodaeth gyfansoddiadol arni i fesur popeth â wna â llinyn mesur cynaladwyedd. Daw’r ddarlith yn nghanol cyfnod ymgynghori'r Cynulliad ynglŷn â’r cynllun hwn. "Rwy’n gobaithio y bydd y ddarlith yn helpu pobl i ddysgu am y mater tyngedfennol hwn fel y byddant yn gallu ymateb yn well i ymgynghoriad y Cynulliad," medd Siôn Meredith, Rheolwr T yng Nghymru.
Mae Syr John Houghton yn gyn Brif Weithredwr y Swyddfa Dywydd ac mae bellach yn aelod o’r Panel Rhyng-lywodraethol ar Newid yn yr Hinsawdd. Cynhleir y ddarlith ym Mhrif Ddarlithfa’r Celfyddydau, Prifysgol Bangor am 7.30pm, nos Wener 7 Tachwedd 2003. Mynediad am ddim.
"Mae Tearfund yn bryderus iawn ynglŷn â’r newid yn yr hinsawdd a’i effaith ar bobl dlawd," medd Swyddog Polisi Cyhoeddus Tearfund Sarah Le Trobe, awdur y papur polisi Climate Change and Poverty. "Pryderwn y bydd y newid yn yr hinsawdd yn peri trychinebau mwy cyson a mwy difrifol yn yr unfed ganrif ar hugain, ac rydym yn helpu cymunedau tlawd i baratoi ar eu cyfer."
22/10/03